Í könnun umhverfiskönnun Gallups 2018 sem kynnt var fyrir helgi kemur í ljós að tæpur helmingur svarenda vill að stjórnvöld hvetji til eða efli skógrækt til þess að draga úr uppsöfnun gróðurhúsalofttegunda í andrúmslofti. Af þeim aðgerðum sem svarendur sögðust vilja að hið opinbera setti í forgang á sviði umhverfis- og loftslagsmála nefndu flestir að draga ætti úr losun, næstflestir að auka ætti ívilnanir við kaup á vistvænum bílum og í þriðja sæti kom aukin skógrækt.
Í dag var undirritaður samningur á milli Skógræktarinnar og Vatnajökulsþjóðgarðs um umsjón Ásbyrgis í Kelduhverfi. Samkvæmt samningnum færist formleg umsjón jarðarinnar allrar og mannvirkja á henni frá Skógræktinni til Vatnajökulsþjóðgarðs. Vatnajökulsþjóðgarður og Skógræktin eiga engu að síður áfram með sér samstarf um innri hluta Ásbyrgis og land Ásbyrgis norðan þjóðvegar.
Skógræktin hefur gert samkomulag við Límtré Vírnet og Nýsköpunarmiðstöð Íslands um tilraunavinnslu á íslensku timbri til límtrésframleiðslu. Öflun viðar til verkefnisins hefst í næstu viku.
Skógasvið FAO hefur efnt til samkeppni um hönnun stuttermabola til að vekja athygli á alþjóðlegum degi skóga 2019 sem helgaður er skógum og fræðslu. Vinningstillagan verður notuð sem opinber stuttermabolur þessa dags sem er 21. mars.
NordGen og SNS bjóða námsstyrki til að örva menntun og þekkingarmiðlun um framleiðslu á trjáplöntufræi og skógarplöntum, um aðferðir við endurnýjun skógar og trjákynbætur. Umsóknarfrestur er til 15. febrúar.