Skógræktin - þjónusta, ráðgjöf, rannsóknir

Kalamalka-skógræktarrannsóknastöðin í Vernon er miðstöð trjákynbóta og erfðarannsókna fyrir innlandssvæði Bresku-Kólumbíu. Þar eru stundaðar rannsóknir og kynbætur á risalerki, blágreni, degli, stafafuru og hvítfuru. Íslenskur hópur sem heimsótti stöðina í september 2013 fékk þar góðar móttökur og fræðslu um starfsemina.

Þegar land tekur að hækka í átt að Klettafjöllunum í suðurhluta Bresku-Kólumbíu verða skógarnir öllu gróskumeiri en á láglendi milli fjallgarða, enda öllu meiri úrkoma. Í jöklaþjóðgarðinum Glacier National Park, áður en komið er upp í hæstu fjöll, er að finna gróðurbelti þar sem degli, marþöll og risalífviður eru ríkjandi trjátegundir.

Í lok september 2013, þegar hópur íslensks skógræktarfólks ók yfir Rogers Pass í jöklaþjóðgarðinum og síðan þegar komið var að Moraine Lake og Lake Louise í Banff-þjóðgarðinum í Klettafjöllum Alberta mætti hópnum afar kunnuglegt veður. Hiti var rétt ofan frostmarks, nýr snjór var í fjöllum og hann gekk á með lítilsháttar slydduéljum. Nákvæmlega eins og á norðlenskum heiðum á þessum árstíma.