Skógrækt á svörtum sandi

Hluti þátttakenda í fyrsta gróðursetningardegi Skógræktar- og uppgræðslufélags Þorlákshafnar og Ölfuss af þremur sem boðað er til í sumar. Ljósmynd af dfs.is.

Skógræktar- og uppgræðslufélag Þorlákshafnar og Ölfuss hóf formlega starfsemi sína árið 2014. Gengið var frá samningi við Sveitarfélagið Ölfus um úthlutun á 55 hektara lands til uppgræðslu og skógrækt á Þorlákshafnarsandi á móts við Eyrabakkaveg. Síðan  hefur verið gróðursett árlega á svæðinu. Þannig hefst frétt á Fréttavef Suðurlands, dfs.is, sem birtist 25. júlí.

Fram kemur í fréttinni að borinn sé áburður og hrossaskítur á valin svæði til að binda jarðveg og búa land undir gróðursetningu. Töluverð lúpína sé á svæðinu en einnig ber sandur inn á milli sem mikilvægt sé að binda og græða aðeins upp áður en hafist sé handa við gróðursetningu.

Þá er greint frá því að fjöldi gróðursettra plantna hafi verið nokkuð breytilegur ár frá ári, allt frá um tvö þúsund plöntum og upp í tíu þúsund. Félagið hafi notið mikillar velvildar víða og sveitarfélagið aðstoðað við flutning á aðföngum. Sláturfélag Suðurlands hefur gefið félaginu úrgangsáburð og Hestmannafélagið Háfeti hrossaskít til dreifingar á sandinum. Þá hafi Landgræðsla ríkisins einnig styrkt félagið til áburðarkaupa. Sótt hafi verið um styrk í Uppgræðslusjóð Ölfuss og fjármagn fengist til plöntukaupa. Plönturnar hafa verið keyptar í heimabyggð, hjá gróðrarstöðinni Kjarri í Ölfusi. Skógræktarfélag Árnessýslu hefur líka úthlutað félaginu árlega um 600-800 plöntum til gróðursetningar og segir í fréttinni að öll þessi velvild sé félaginu afar mikilvæg. Félagsfólk og almenningur í Ölfusi vinni alla vinnuna í sjálfboðavinnu og markmiðið sé að græða markvisst upp svæðið, skapa skjólsæla lundi og stígakerfi sem henta til útivistar og hvers konar hreyfingar.

Skógræktar- og uppgræðslufélag Þorlákshafnar og Ölfuss boðar fólk til gróðursetningar árlega og þrír slíkir gróðursetningardagar hafa verið skipulagðir í sumar. Sá fyrsti var þriðjudaginn 17. júlí og kom góður hópur áhugasams fólks, bæði fullorðinna og barna. Gróðursettar voru um 2.500 plöntur, birki, víðitegundir ösp. Fram kemur í frétt dfs.is að töluverður árangur sé farinn að sjást af þessu starfi þótt gengið hafi á ýmsu. Stundum hafi miklir þurrkar eftir gróðursetningu spillt fyrir og sterkir vindar, sérstaklega þegar blæs af sjó.

Á Hafnarsandi eins og annars staðar fer að ganga betur eftir því sem trén vaxa upp en lúpína veitir líka skjól á sumrin. Frétt dfs.is endar á þeim nótum að smám saman verði þarna paradís fyrir alla og með samtakamáttinn að vopni verði til góður skógur handa samfélaginu.

Fréttin á df.is