Opinn þemadagur um skógarplöntuframleiðslu

Þemadagur Nordgen var haldinn í starfstöð Skógræktarinnar á Mógilsá undir Esjuhlíðum 13. apríl 2023. Á dagskránni var fræðsla um skógarplöntuframleiðslu og vr öllum heimil þátttaka endurgjaldslaust, á staðnum eða í fjarfundi.

Bjørn Borgan, framkvæmdastjóri Alstahaug-trjáplöntustöðvarinnar í Norður-Noregi flutti tvö erindi, annars vegar um ræktun sitkagrenis í gróðrarstöð og hins vegar um hvernig forðast má sýkingar í trjáplöntuuppeldi. Alstahaug-stöðin er í Sandnessjøen sem er kaupstaður á Hálogalandi í Noregi á 66. gráðu norðlægrar breiddar þannig að aðstæður þar eru um margt svipaðar því sem er á Íslandi. Erindi Bjørns voru flutt á ensku en önnur erindi á íslensku. Fjallað var um áskoranir í plöntuframleiðslu með aukinni eftirspurn, fjölgun lerkiblendingsins 'Hryms' með græðlingum, hraðfjölgun alaskaaspar, ræktunarferli plantna til geymslu og afhendingar úr frysti en líka um áhrif gróðursetningartíma frystra plantna á sumarvöxt og frostþol að hausti. Í dagskrá hér að neðan eru hlekkir á glærur fyrirlesara.

Nordgen er sameiginlegur genabanki Norðurlandanna og samstarfsvettvangur landanna um erfðaauðlindir og rannsóknir á þeim. Skógasviðið, Nordgen Skog, stendur meðal annars fyrir fræðslu í formi ráðstefnu og þemadaga sem fram fara til skiptis í löndunum fimm. NordgenSkog er samræðuvettvangur þar sem kemur saman vísindafólk, ræktendur, stjórnendur og aðrir sem starfa að skógum og skógrækt með einhverjum hætti.

Nánar um Nordgen Skog