Nóvembergróðursetning

Gróðursetning í nóvember er vissulega ekki venjan. En þegar tíðarfarið er gott eins og þetta haustið er ekkert sem mælir gegn slíku. Helsta hindrunin er hvað dagurinn er stuttur. Ljósmynd: Valgerður Erlingsdóttir

Ekkert er því til fyrirstöðu að gróðursetja tré í nóvember ef tíðarfar hefur verið gott eins og þetta haustið. Starfsfólk starfstöðvar Skógræktarinnar á Selfossi setti niður aspir og furur í landi Kollabæjar í Fljótshlíð í síðustu viku undir stjórn Hrafns Óskarssonar, ræktunarstjóra á Tumastöðum. Búist er við um tuttugu tonna árlegri meðalbindingu koltvísýrings á svæðinu.

Nokkrir starfsmenn frá starfstöð Skógræktarinnar á Selfossi héldu 16. nóvember 2023 að Tumastöðum til gróðursetningar undir dyggri stjórn Hrafns Óskarssonar, ræktunarstjóra þar. Reiturinn sem gróðursett var í er hluti af svokölluðu „Nýfundnalandi“ sem er spilda úr landi Kollabæjar. Nokkur bið hafði verið eftir að fá framkvæmdaleyfi fyrir verkinu og því hafði dregist að gróðursetja í spilduna.

Að sögn Trausta Jóhannssonar, skógarvarðar á Suðurlandi hefur veðrið í nóvember verið afar milt og því ekkert til fyrirstöðu að gróðursetja þó komið sé fram í seinni hluta nóvembermánaðar. Gróðursetningin er unnin í samstarfi við European Festivals Forests, verkefni sem stuðlar að kolefnisbindingu í skógi til að vega upp kolefnislosun þeirra hátíða sem haldnar eru á vegum European Festivals Association.

Alls voru gróðursettar tæplega 3.000 plöntur af alaskaösp og stafafuru þennan milda fimmtudag í nóvember. Helsta vandamálið við gróðursetningar á þessum árstíma er hversu stuttir dagarnir eru, segir Trausti. Hann bætir við að samkvæmt kolefnisspá fyrir svæðið megi gera ráð fyrir því að árleg meðalbinding í reitnum verði um 20,6 tonn af koltvísýringi sem er dágott. Aftur verður gróðursett á næsta ári og þá er gert ráð fyrir að sett verði niður um 6.000 tré.

Heimild: Trausti Jóhannsson
Myndir: Valgerður Erlingsdóttir
Texti: Pétur Halldórsson