Sigríður Júlía Brynleifsdóttir og Edda Sigurdís Oddsdóttir taka þátt í norrænu samstarfi kvenna í sk…
Sigríður Júlía Brynleifsdóttir og Edda Sigurdís Oddsdóttir taka þátt í norrænu samstarfi kvenna í skógrækt. Hér eru þær í heimsókn í viðarvinnslu fyrirtækisins Norske Skog Saugsbrug. Mynd: ESO

Skilaboðin frá nýafstöðnu landsþingi norskra skógarkvenna

Skógrækt og skógarnytjar leika mikilvægt hlutverk í því að gera norska hagkerfið grænt. Til þess þarf metnaðarfulla skógar­eigendur og hagnýta menntun í skógar­nytj­um. Þetta er meðal þess sem rætt var á ný­afstöðnu landsþingi norskra kvenna í skóg­rækt sem fram fór í Halden á Austfold.

Samtök kvenna í skógrækt á Austfold, Ósló og Akershus buðu tveim­ur konum frá Ís­landi að sitja lands­þing­ið, þeim Eddu Sigur­dísi Oddsdóttur, jarðvegs­vist­fræð­ingi á Mó­gils­á, og Sigríði Júlíu Brynleifsdóttur, svið­stjóra skógar­auðlinda­sviðs Skógræktar­inn­ar. Styrkur til ferðarinnar fékkst úr Norsku þjóðargjöfinni. Á landsþinginu koma saman konur allt frá skógareigendum og starfsfólki í skógrækt og skógariðnaði upp í vísindafólk og útivistarfólk. Þannig hafa konurnar hag af ólíkum bakgrunni hver annarrar. Til dæmis búa ekki allir skógareigendur að menntun í skógfræðum en fá þarna tækifæri til að læra af öðrum.


Að sögn Eddu var þetta afskaplega fróðleg og skemmtileg ferð. Skoðuð hafi verið starf­semi fyrirtækisins Borregaard sem rekur eina háþróuðustu lífmassavinnslu í heimi í Sarpsborg. Þar eru framleidd ýmiss konar lífefni sem leyst geta af hólmi efni unnin úr jarðolíu. Edda segir það hafa ver­ið mjög áhugavert að sjá hversu mikið sé hægt að vinna úr timbrinu annað en spýtur og pappír. Í ferðinni hafi einnig verið heim­sótt hefðbundnari pappírsvinnsla Norske Skog í Halden, einn stærsti framleiðandi tímaritapappírs í heiminum. Bæði þessi fyrirtæki hafa starfað frá því á nítjándu öld og verið mikilvægir timburkaupendur fyrir norska skógrækt í meira en öld.

Á landsþinginu var menntun á skógar­svið­inu mikið til umræðu og eining um að viðhalda yrði námi á borð við það sem er í boði í framhaldsskólanum Sønsterud á Heiðmörk og að verkefnið Velg Skog yrði framlengt. Í því verkefni er unnið að því að kynna ungmennum skógar­tengt nám og hvetja það til að hasla sér völl á skógarsviðinu. Þetta þykir hafa bor­ið góðan árangur enda hefur nemendum í skógartengdu námi fjölgað á ný í Noregi að undanförnu.

Nadja Stumberg, formaður samtaka kvenna í skógrækt á Austfold, Ósló og Akershus­, býður þátttakendur velkomna á landsþingið. Mynd: Kvinner i skogbruket

Stórþingið í Noregi hefur sett sér að Nor­eg­ur dragi úr losun gróðurhúsa­loft­teg­unda um 40 prósent fram til ársins 2030. Aukin notk­un timburs er hluti af lausninni við loftslags­vandanum. Í fréttatilkynningu sem send var út að loknu landsþinginu í Halden er bent á að í þessum efnum þurfi sveitar­félögin að fara fyrir með góðu fordæmi og axla sína ábyrgð á þessu stóra verkefni. Athuganir hafi því miður sýnt að fá sveitar­félög hafi enn sem komið er sett sér að ná þessum markmiðum stjórnvalda, lítil vitund sé um loftslagsmálin hjá sveitarfélögunum og um aukna notkun timburs sem bygg­ing­ar­efnis.


Texti: Pétur Halldórsson