Binding metin í skógum Landsvirkjunar

Hluti kortlagningar af skógum Landsvirkjunar við Sogsstöðvar, eldri skógar merktir með rauðu. Brot af korti úr skýrslunni

Kolefnisbinding á skógræktarsvæðum Landsvirkjunar var ríflega 2.600 tonn af CO₂ á síðastliðnu ári. Binding hefur dregist lítillega saman frá síðustu úttekt sem gerð var fimm árum fyrr en spáð er að hún vaxi á ný á næsta ári, einkum í yngri gróðursetningum. Þetta kemur fram í nýrri skýrslu sem komin er út á vef Landsvirkjunar.

Í loftslags- og umhverfisstefnu sinni leggur Landsvirkjun áherslu á að ná kolefnishlutleysi. Einn þáttur í þeirri viðleitni er kolefnisbinding með skógrækt. Landsvirkjun gerir grein fyrir þeirri bindingu í loftslagsbókhaldi sínu sem hún birtir árlega með ársskýrslu. Skógræktin gerði fyrst úttekt á bindingu í skógum Landsvirkjunar árið 2011 og svo aftur 2016.

Í skýrslunni er kynnt úttekt sem gerð var haustið 2021 með það að markmiði að meta með viðurkenndum og vísindalegum hætti kolefnisbindingu skógræktar á vegum Landsvirkjunar. Er þá átt við skógrækt sem Landsvirkjun hefur kostað með einum og öðrum hætti. Eldri skógræktarsvæði í nágrenni Sogsstöðva, Blöndustöðvar og Búrfellsstöðvar voru endurmæld með því að endurtaka mælingar á mæliflötum sem mældir voru í álíka úttektum árin 2011 og 2016, auk þess sem nýir mælifletir voru lagðir í nýjar gróðursetningar við Blöndustöð. Við þetta bætast sex ný svæði, Laxaborg í Dölum, Belgsá í Fnjóskadal og Skarfanes í Landssveit þar sem land og ræktun er í umsjón Skógræktarinnar, nýræktun á Skálmholtshrauni í Flóa og við Bjarnarlón ofan Búrfellsstöðvar auk eldri ræktunnar við Laxárstöð í Aðaldal.

Á eldri svæðunum var lífmassavöxtur og þar af leiðandi kolefnisbinding trjágróðurs metin ásamt bindingu í jarðvegi og sópi. Á yngri svæðunum er trjávöxtur enn sem komið er of lítill til að mæla hann og þar var kolefnisbinding í jarðvegi og sópi einungis metin eftir landgerðarmati. Út frá þessari vinnu var hægt að áætla heildarbindingu á skógræktarsvæðum Landsvirkjunar 2.645 tonn CO₂ (± 185 tonn CO₂ (95% vikmörk)) á árinu 2021.

Samanburður við eldra mat leiðir í ljós að árleg binding hefur dregist lítillega saman á þeim 5 árum sem liðin eru frá síðustu úttekt. Þó er spáð fyrir um aukna bindingu á næsta áratug og munar þar mestu um áætlaða aukna bindingu í yngri gróðursetningum. Á nýju svæðunum með ungum gróðursetningum var gerð greining á þéttleika og lifun trjáplantna og leiðir hún í ljós mikinn mun á þéttleika og lifun á milli svæða og einnig trjátegunda. Til að svæðin skili ásættanlegri bindingu er íbóta þörf í núverandi gróðursetningar á þeim svæðum þar sem lifun reyndist of lítil.

Lesa má skýrsluna með því að smella á þennan hlekk:

• Úttekt á kolefnisbindingu skógræktar Landsvirkjunar árið 2021

Frétt: Pétur Halldórsson