Icelandic Agricultural Sciences rafrænt framvegis

Örverur úr íslenskum hverum geta étið hálm og búið til úr honum etanól. Mynd: Wikimedia Commons/Strohräder

Greinar koma nú út um leið og þær hafa verið ritrýndar

Fyrstu tvær greinarnar í hefti þessa árs af Icelandic Agricultural Sciences eru nú komnar út á netinu. Ritið verður framvegis eingöngu gefið út á rafrænu formi.

Annars vegar er grein eftir Eyþór Einarsson o.fl. um árangur nýrrar rafrænnar aðferðar (VIAscan®) til að meta vöðvahlutfall lamba í sláturhúsum hérlendis og hvernig arfgengi vöðvahlutfalls er háttað í íslenska sauðfjárstofninum. Niðurstöður gefa til kynna að rafrænt kjötmat sé nothæf aðferð við íslenskar aðstæður og að mælingar sem matið skilar megi nýta í kynbótastarfi í sauðfjárrækt hérlendis. Höfundar eru frá Landbúnaðarháskóla Íslands, Bændasamtökunum og áströlsku rannsókna- og þróunarfyrirtæki.

• Rafræn útgáfa greinarinnar 

Hins vegar er grein eftir Jan Eric Jenssen o.fl. um getu Paenibacillus-stofns, sem einangraður hefur verið úr íslenskum hverum, til að framleiða etanól og önnur hvarfefni úr sykrum eða beint úr vallarfoxgrasi. Etanólframleiðsla stofnsins samsvaraði 250 lítrum á tonnið af vallarfoxgrasi, sem er svipað og ýmsar nýlegar rannsóknir hafa verið að sýna að hægt er að vinna úr lífmassa hveitihálms, sem er aukaafurð í kornrækt erlendis sem áhugi er að nýta í etanólframleiðslu. Höfundar eru frá Háskólanum á Akureyri og Landbúnaðarháskóla Íslands.

• Rafræn útgáfa greinarinnar

Nýlunda er að greinar í Icelandic Agricultural Sciences komi formlega út rafrænt um leið og þær hafa verið faglega ritrýndar. Sú breyting hefur hins vegar orðið að nú fá allar greinar svokallað rafrænt doi-númer frá alþjóðlega gagnagrunninum CrossRef, sem þýðir að þær eru formlega birtar um leið og þær koma út á netið. Þetta er stór áfangi hjá ritinu og mun auka sýnileika þess enn frekar alþjóðlega og jafnframt auðvelda aðgang erlendra sem innlendra fræðimanna að því. 

Þetta þýðir um leið að nú er óþarft að prenta eintök af ritinu svo að greinar teljist formlega birtar. Það gerir að verkum að nú mun sá tími styttast verulega sem höfundar þurfa að bíða frá því að þeir senda inn handrit til birtingar þar til þau koma formlega út. Innan skamms verða settar inn í leiðbeiningar til höfunda á heimasíðu ritsins (www.ias.is) sem taka mið af þessu. Frá og með þessu ári mun ritið því eingöngu koma út í rafrænu formi.

Ritstjórar tímaritsins Icelandic Agricultural Sciences hvetja nemendur í rannsóknarnámi og aðra kollega til að nota ritið sem vettvang vísindaskrifa sinna. Þetta sé ISI rit og þar með fyrsta flokks alþjóðlegt fræðirit, bæði vel sýnilegt og virt af kollegum utan lands sem innan.

• Vefur IAS

Heimild: Ritstjórar IAS
Mynd: Strohräder