Líf í lundi um helgina

Líf í lundi er yfirskrift fjölbreyttra viðburða sem verða í skógum víða um land um helgina. Skógræktin tekur að venju þátt í undirbúningi og framkvæmd Skógardagsins mikla á Hallormsstað en svo eru skógræktarfélög víða um land með ýmiss konar viðburði í skógum sínum. Viðburðirnir verða flestir á laugardag, 25. júní en annars á sunnudag eða mánudag. Efnt er til ljósmyndasamkeppni í tengslum við hátíðina og fólki boðið að skrá sig til leiks með því að nota myllumerkið #lifilundi þegar það deilir myndum sínum á Instagram eða Facebook.

Upphitun hefst reyndar fyrir Skógardaginn mikla kl. 18 á föstudagskvöld þegar í boði verður fiskisúpa í Mörkinni Hallormsstað og efnt til söngs. Fólk er beðið að koma með skógarbollann með til að fá súpu í og svo geta allir tekið þátt í söngnum. Á laugardag verða hefðbundin atriði á Skógardeginum mikla með matarveislu, Íslandsmóti í skógarhöggi, leiki, þrautum, tónlist og skemmtun þar sem Magni kemur meðal annars fram.

Ljósmyndasamkeppni

Farið með myndavélina eða símann út um helgina og takið myndir í skógum landsins, af viðburðum Lífs í lundi eða bara á ferðum ykkar um skógana. Deilið myndum á Instagram eða Facebook og notið myllumerkið #lifilundi til að myndin ykkar komist í pottinn. Valdar verða tíu bestu myndirnar og settar á Facebook-síðu Lífs í lundi og sú sem fær flest læk eða umsagnir vinnur. Spennandi skógræktarverðlaun eru í boði!

Viðburðir

Allir viðburðir undir merkjum Lífs í lundi eru kynntir á Skógargáttinni, skogargatt.is, en hér að neðan er stutt upptalning með hlekkjum á nánari upplýsingar:

• Skógræktarfélag Hafnarfjarðar býður til fjölskyldudags í Höfðaskógi í grennd við Hvaleyrarvatn og verður fjölbreytt dagskrá frá kl. 14 á laugardag.
• Skógræktarfélag Eyfirðinga verður með skógargöngu, fuglafræðslu og leiðsögn í að tálga fugla í Hánefsstaðareit Svarfaðardal á sunnudag kl. 13.
• Í Slögu við Akranes verður Skógræktarfélag Akraness með skemmtilegan skógardag eða skógarkvöld á mánudag frá kl. 18.
• Skógræktarfélag Rangæinga býður til hátíðar á laugardag í Bolholtsskógi.
• Skógræktarfélag Reykjavíkur og Ásatrúarfélagið standa fyrir skógarblóti í Öskjuhlíð kl. 21 á laugardagskvöld nálægt hofi ásatrúarfólks og lofa kynngimagnaðri stund fyrir alla fjölskylduna.
• Gróðursetningardagur fjölskyldunnar verður haldinn hátíðlegur í Kópavogi kl. 17 á mánudag á vegum Skógræktarfélags Kópavogs og Kópavogsbæjar með gróðursetningu, leikjum og göngu.
• Í Hvalfirði verður Skógræktarfélag Skilmannahrepps með dagskrá í Álfholtsskógi á laugardag sem hefst kl. 11 með víkingabúðum, plöntugreiningu og fleiru en skógarganga verður á sunnudag kl. 13.
• Skógræktarfélag Suður-Þingeyinga býður til opins dags í Fossselsskógi kl. 14 og er mæting við Geirasel.
• Samvera verður líka í Seljadalsskógi á laugardag kl. 11 á vegum Skógræktarfélags Bíldudals með skógargöngu.
• Og Skógræktarfélag Reykjavíkur efnir líka til gróðursetningardags frá 10-15.30 á laugardag í Úlfarsfelli þar sem félagsfólk og almenningur getur lagt sitt af mörkum í að rækta útivistarskóg framtíðarinnar.

Gleðilega hátíð!

• Vefur Lífs í Lundi á Skógargáttinni
• Líf í lundi á Facebook
• Líf í lundi á Instagram

Texti: Pétur Halldórsson