Nýr samningur um Landgræðsluskóga

Landgræðsluskógar hafa úthlutað trjáplöntum til margvíslegra verkefna víða um landið. Með nýjum samningi er starfsemin tryggð næstu fimm árin. Ljósmynd af Hólasandi: Pétur Halldórsson

Nýr samningur um Landgræðsluskóga var undirritaður mánudaginn 11. febrúar og felur hann í sér áframhaldandi stuðning ríkisins við verkefnið, sem hefur það að markmiði, eins og segir í samningum „að græða lítt og ógróið land með fjölbreyttum skógum og stuðla þannig að ræktun skóga til úti­vist­ar fyrir almenning, endurheimt vistkerfa og eflingu líffræðilegrar fjölbreytni og framkvæmd stefnu íslenskra stjórnvalda í loftslagsmálum, sem og að vinna að framkvæmd laga um skógrækt og laga um landgræðslu“.

Undir samninginn skrifuðu Guðmundur Ingi Guð­brandsson, umhverfis- og auðlindaráðherra, og Jónatan Garðarsson, formaður Skógræktar­félags Íslands, ásamt Árna Bragasyni landgræðslustjóra og Aðalsteini Sigurgeirssyni, fagmálastjóra Skóg­ræktarinnar. Landgræðslunni og Skóg­rækt­inni er falið faglegt eftirlit með framkvæmd verk­efnis­ins samkvæmt samningnum.

Landgræðsluskógaverkefnið hófst árið 1990 og var hleypt af stokkunum í tilefni 60 ára afmælis Skógræktarfélags Íslands, í samvinnu skóg­ræktar­félaganna í landinu, Skógræktar ríkisins, Landgræðslu ríkisins og þáverandi land­bún­að­ar­ráðu­neyt­is. Skógræktarfélag Íslands sér um stjórn verk­efnis­ins, en skógræktarfélög um land allt sjá um framkvæmd þess á hverjum stað, svo sem gróðursetningu og umhirðu. Þinglýstir samningar eru gerðir um öll svæði sem gróðursett er í.

Nýi samningurinn gildir til næstu fimm ára og felur í sér 45-55 milljóna króna árlegt framlag til verkefnisins, alls 260 milljónir á samningstímanum.

Heimild: Vefur Skógræktarfélags Íslands

Texti: Pétur Halldórsson