Lárus Íslandsmeistari í sjötta sinn

Skógarhöggsmenn hvíla lúin bein eftir átökin á Íslandsmeistaramótinu í skógarhöggi. Íslandsmeistarinn Lárus Heiðarsson lengst til vinstri. Mynd: Esther Ösp Gunnarsdóttir.

Skógardagurinn mikli vel heppnaður

Skógardagurinn mikli 2015 var haldinn í einmuna blíðu í Hallormsstaðaskógi laugardaginn 20. júní. Þetta var langbesti sumardagurinn sem komið hefur á Héraði þetta sumarið og aðsóknin eftir því. Fjöldi manns naut veðurblíðunnar og þeirra viðburða sem á dagskránni voru. Lárus Heiðarsson varð Íslandsmeistari í skógarhöggi í sjötta sinn.

Íslandsmeistaramótið í skógarhöggi er einn aðalviðburður Skógardagsins mikla á hverju ári og hefur sannarlega fest sig í sessi. Keppnin var spennandi og skemmtileg í ár eins og ávallt áður en skógarbóndinn og skógræktarráðunauturinn Lárus Heiðarsson á Droplaugarstöðum bar sigur úr býtum að þessu sinni. Þetta var í sjötta sinn sem Lárus hampaði Íslandsmeistaratitlinum og greinilegt að hann heldur sér vel við í greininni. Í öðru sæti varð Ólafur Árni Mikaelsson og Hörður Guðmundsson í því þriðja. Verðlaunin í keppninni voru Husqvarna-vörur frá umboðinu MHG.

Sigurvegararnir í skógarhlaupinu. Mynd: Esther Ösp Gunnarsdóttir..">