Fjögur af hverjum fimm jólatrjám koma að utan

Stórverslun vildi selja hærra hlutfall íslenskra trjáa ef þau byðust

„Við viljum klæða landið skógi. Af hverju tré sem við seljum um jólin plöntum við öðrum fimm trjám. Í því felst virðisaukinn fyrir okkur." Þetta segir Jónatan Garðarsson, formaður Skógræktarfélags Hafnarfjarðar, í umfjöllun Fréttablaðsins um jólatré. Fram­kvæmdastjóri hjá Húsasmiðjunni segir ákjósanlegra ef fyrirtækið gæti verið með hærra hlutfall innlendra trjáa í jólatrjáasölu sinni.

Fram kemur að Ísland gæti eftir tvo áratugi framleitt nægilega mörg jólatré til að anna eftirspurn hér á landi að mati skóg­fræð­ings. Innlend tré séu umhverfisvænni og stuðli að minnkandi vistspori. Tæplega 30 þúsund tré séu flutt inn til landsins í ár.

Sveinn Arnarson blaðamaður skrifar um málið og grein hans er á þessa leið:

Af þeim rúmlega 35 þúsund lifandi jólatrjám sem Íslendingar skreyta í stofum sínum um jólin eru aðeins um sex til átta þúsund ræktuð hér á landi. Hinn hlutinn, eða um 80 prósent lifandi jólatrjáa, er ræktaður erlendis.

Else Möller, skógfræðingur á Austurlandi, segir innlenda framleiðslu jólatrjáa í raun ekki til. Þau innlendu jólatré sem koma á markað séu úr grisjun skóga. Erlendis, líkt og í Danmörku, sé um iðnað að ræða þar sem framleidd eru 10 milljón jólatré árlega. Hún segir mögulegt að Íslendingar geti annað eftirspurn hér á landi án innflutnings.

„Við getum séð fyrir okkur að eftir 15 til 20 ár verði framleiðsla okkar á þeim stað að anna eftirspurn. Það er mögu­legt. Hins vegar þarf þá að vinna þessa vinnu markvisst. Íslensk framleiðsla er auðvitað mun vistvænni en að flytja inn jólatré í miklu magni,“ segir Else.

Kristinn Einarsson, framkvæmdastjóri verslanasviðs Húsasmiðjunnar, segir aðeins um 15 prósent jólatrjáa þeirra vera framleidd á Íslandi.

„Það er þá mest stafafura sem við fáum. Það er ekki hægt að komast í aðrar tegundir hér á landi með góðu móti. Hins vegar væri það miklu ákjósanlegra fyrir okkur ef við gætum verið með hærra hlutfall innlendrar framleiðslu hjá okkur,“ segir Kristinn.

Skógræktarfélag Hafnarfjarðar hefur upp á síðkastið selt um fjögur til fimm hundruð jólatré á hverju ári og er það mest stafafura. Jónatan Garðarsson, formaður skógræktarfélagsins, segir ágóða af sölunni fara í áframhaldandi skógrækt. „Við viljum klæða landið skógi. Af hverju tré sem við seljum um jólin plöntum við öðrum fimm trjám. í því felst virðisaukinn fyrir okkur.“

Else segir verkkunnáttuna hér á landi ekki til staðar eins og staðan er núna. „Í Danmörku til dæmis er starfsfólkið á ökrunum nánast allt frá Austur-Evrópu og þar eru tré klippt til að ná ákjósanlegri lögun. Þessi handavinna er eitthvað sem við þekkjum lítið til og þurfum því að tileinka okkur,“ segir Else.

• Fréttablaðið 30. nóvember 2017