Að lokinni undirskrift samningsins á aðalskrifstofu Skógræktarinnar í vikunni. Frá vinstri: Gunnlaug…
Að lokinni undirskrift samningsins á aðalskrifstofu Skógræktarinnar í vikunni. Frá vinstri: Gunnlaugur Guðjónsson, sviðstjóri rekstrarsviðs Skógræktarinnar, Páll Snorrason, framkvæmdastjóri rekstrar- og fjármálasviðs Eskju, Þröstur Eysteinsson skógræktarstjóri, Erna Þorsteinsdóttir, stjórnarformaður Eskju, og Sigrún Ísaksdóttir, skrifstofustjóri hjá Eskju.

Sjávarútvegsfyrirtækið Eskja á Eskifirði hefur samið við Skógræktina um að þróa kolefnisverkefni í landi jarðarinnar Freyshóla á Fljótsdalshéraði. Þar hyggst fyrirtækið binda kolefni með nýskógrækt á um 30 hektara svæði. Gróðursetningu á að ljúka vorið 2023 og með verkefninu verða til vottaðar kolefniseiningar sem tryggja ábyrga kolefnisbindingu á móti samsvarandi losun vegna starfsemi Eskju. Með þessu verður Eskja fyrsta sjávarútvegsfyrirtækið sem ræðst í ábyrga kolefnisjöfnun sam­kvæmt kröfum Loftslagsráðs.

Hlutverk Skógræktarinnar er að gera ræktunaráætlun fyrir svæðið, verkefnalýsingu fyrir kolefnis­verkefnið ásamt kolefnisspá og kostnaðaráætlun til 50 ára. Verkefnið skal fullnægja kröfum Skógar­kolefnis þannig að það sé tækt til vottunar óháðs vottunaraðila til skráningar í Loftslagsskrá Íslands. Loks veitir Skógræktin aðra ráðgjöf sem Eskja kann að óska eftir við þróun verkefnisins.

Gert er ráð fyrir að undirbúningi ljúki fyrir árslok og framkvæmdir hefjist næsta vor með undirbúningi lands. Gróðursett verður í byrjun og lok næsta sumars og gróðursetningu lýkur vorið 2023. Þá verður fullgróðursett í svæðið og við tekur vaxtartími skógarins með reglulegum úttektum. Gangi allt að óskum verða fyrstu vottuðu einingarnar til að fimm árum liðnum frá því að gróðursetningu lýkur.

Eskja sérhæfir sig í veiðum og vinnslu á uppsjávarfiski sem ýmist eru frystar eða framleitt úr hágæða fiskimjöl og lýsi. Fyrirtækið hefur á undanförnum árum ráðist í ýmsar aðgerðir til að draga úr umhverfisáhrifum starfsemi sinnar en í dag er landvinnsla félagsins knúin rafmagni. Sem dæmi má nefna byggði félagið uppsjávarfrystihús 2016 og flutti þar með frystingu sjávarfangs af sjó og í land þar sem notað er raf­magn í stað olíu. Árið 2012 var mjöl- og lýsisvinnsla Eskju rafvædd að fullu. Við endurnýjun skipaflota hefur Eskja lagt og mun leggja áherslu á sparneytnari skip og draga markvisst úr olíunotkun fyrir­tækisins. Eskja hefur nú hafið útgáfu á árlegri samfélagsskýrslu þar sem notuð eru viðmið Global Reporting Initiative um samfélagslega ábyrgð. Kolefnisspor er mælt samkvæmt forskrift SFS/Nasdaq. Með þessu eykur fyrirtækið gagnsæi í starfseminni, m.a. með því að gefa upplýsingar um umhverfis­áhrif og mótvægisaðgerðir og gera grein fyrir árangri í umhverfismálum.

Frá Eskifirði. Ljósmynd: eskja.isÁbyrg kolefnisjöfnun er í góðu samræmi við þessi markmið Eskju. Í henni felst að dregið sé úr losun eins og mögulegt er á hverjum tíma. Með bindingarverkefnum er einungis unnið á þeirri losun sem ekki er hægt að stöðva að svo stöddu. Til að ferlið standist álit Loftslagsráðs um ábyrga kolefnisjöfnun er mikilvægt að farið sé eftir vönduðu regluverki eða gæðakerfi, árangur verkefnisins sé metinn af sérfræðingum og allt ferlið að lokum vottað af óháðu vottunarfyrirtæki. Skógarkolefni er þess háttar regluverk eða gæðakerfi. Verkefni sem unnin eru samkvæmt því eru skráð í Loftslagsskrá Íslands og eftir tiltekinn tíma verða til vottaðar kolefniseiningar sem telja má fram á móti losun eða versla með líkt og verðbréf þar til ákveðið er að nota þær á móti losun.

Nánari upplýsingar veita

Texti: Pétur Halldórsson