Fréttir og pistlar

Danska kirkjan Folkekirken hyggst draga úr kolefnisspori sínu um 70 prósent áður en áratugurinn er úti. Þetta á meðal annars að gera með því að breyta ræktarlandi á kirkjujörðum í villta náttúru og kirkjuskóga. Íslenska þjóðkirkjan leitar einnig leiða til að nýta kirkjujarðir í þágu loftslagsmála, meðal annars í samstarfi við Skógræktina.

Forseti Íslands, Guðni Th. Jóhannesson, afhendir garðyrkjuverðlaunin 2022 á sumarhátíð Garðyrkjuskóla LbhÍ á Reykjum sem fram fer á morgun, sumardaginn fyrsta. Þá verður að venju opið hús í Garðyrkjuskólanum og ýmislegt að sjá og gera. Forsetinn afhendir garðyrkjuverðlaunin á sérstakri hátíðardagskrá milli kl. 14 og 15 og þar afhendir líka formaður Bændasamtakanna umhverfisverðlaun Hveragerðis.

Erfðanefnd landbúnaðarins auglýsir eftir umsóknum um styrki til verkefna sem hafa að markmiði að stuðla að varðveislu og sjálfbærri nýtingu innlendra erfðaauðlinda í landbúnaði. Umsóknarfrestur er til 28. apríl.

Bændurnir á Bollastöðum í Blöndudal, Austur-Húnavatnssýslu, fengu landbúnaðarverðlaunin í ár. Þau taka þátt í verkefninu Loftslagsvænum landbúnaði og vinna að því að innleiða loftslagsvænar aðferðir sem minnka kolefnissporið en auka um leið framleiðni og hagræðingu í búrekstrinum. Þau rækta meðal annars skjólbelti og hagaskóga á jörð sinni.

Tvö pláss eru enn laus á námskeiði um komandi helgi þar sem Ólafur Oddsson og Ólafur G.E. Sæmundsen kenna hvernig smíða má húsgögn úr skógarefni. Námskeiðið er á vegum Endurmenntunar LbhÍ.