Fréttir og pistlar

Loftmyndir ehf. og Landmælingar Íslands hafa undirritað tímamótasamning um aðgengi að loftmyndum Loftmynda ehf. fyrir allar A-hluta ríkisstofnanir. Þetta er fagnaðarefni fyrir skógrækt á Íslandi því loftmyndir verða æ mikilvægara tæki til áætlanagerðar í skógrækt, við skógmælingar og úttektir.

Skógræktin tekur þátt í átaki til söfnunar og sáningar á birkifræi nú í haust með sama sniði og í fyrra. Átakið er skipulagt með Landgræðslunni í samvinnu við nokkur samtök og fyrirtæki. Öfugt við síðasta ár er mest fræ að finna norðan- og austanlands en minna á Suður- og Vesturlandi. Alls staðar er fólk þó hvatt til að fara út og leita því lengi má finna fræ þótt ekki sé metár á öllum svæðum.

Skógræktin þarf mikið magn af stafafurukönglum til að anna eftirspurn eftir stafafurufræi til sáningar. Skógræktin greiðir fyrir köngla, sé þeim safnað samkvæmt leiðbeiningum. Stafafura tekur tvö ár í að þroska köngla. Fyrra árið myndast litlir vísar að könglum og seinna árið fullþroskaðir könglar, sem sitja við upphaf árssprota síðasta árs.

Ráðstefna verður haldin í tengslum við lokafund CAR-ES rannsóknarsamstarfsins sem fram fer á Hótel Hallormsstað dagana 5.-7. október. Þar verður fjallað um ýmis málefni sem snerta skógrækt og skógarumhirðu í tengslum við kolefnisbindingu, virka líffjölbreytni, vatnsgæði og jarðvegsgæði.

Á dögunum voru Jón Auðunn Bogason, skógarvörður á Vesturlandi, og Valdimar Reynisson skógræktarráðgjafi á ferð í Stálpastaðaskógi í Skorradal í þeim tilgangi að velja tré til að fella í sérverkefni. Þeir rákust á sjálfsáðar plöntur í skóginum sem þeim þótti öðruvísi en það greni sem er að sá sér þarna. Þegar betur var að gáð kom í ljós að þetta voru sáðplöntur af degli (Pseudotsuga menziesii). Þetta er að öllum líkindum fyrsti fundur slíkra plantna á Íslandi.