Fréttir og pistlar

Um 400 þúsund plöntur verða gróðursettar hjá skógarbændum á Vesturlandi í sumar og um 200 þúsund á Vestfjörðum. Starfsfólk Skógræktarinnar tók á móti sendingu af plöntum í dreifingarstöðinni á Kleppjárnsreykjum í gær.

Í gær var tekið á móti á Hallormsstað stærstu sendingu sem gróðrarstöðin Sólskógar hefur sent frá sér í einni ferð. Alls voru þetta um 218.000 plöntur, lerki og stafafura sem að mestu fara í lönd skógarbænda eystra.

Hönnuðir hjá fyrirtækinu Límtré-Vírneti sem vinna að tilraunum með framleiðslu byggingareininga úr íslensku timbri sjá fyrir sér að hægt verði að hefja blómlegan timburiðnað á Íslandi á næstu árum og áratugum. Fjallað var um timburháhýsi og íslenskt límtré í Samfélaginu á Rás 1 í síðustu viku.

Önnur sending af trjáplöntum frá gróðrarstöðinni Sólskógum barst sunnlenskum skógarbændum í gær þegar flutningabíll með fullfermi frá fyrirtækinu var affermdur á Suðurlandi. Einnig eru hafnir plöntuflutningar frá gróðrarstöðinni Kvistum í Biskupstungum og um helgina fer stærsta sending að Hallormsstað sem Sólskógar hafa sent frá sér.

Samræmd löggjöf um skóga og skógrækt sem samþykkt var á Alþingi í morgun leysir af hólmi lög sem að stofni til voru frá árinu 1955. Ýmis nýmæli eru í nýju lögunum. Til dæmis fær hugtakið þjóðskógar lagalegt gildi og Skógræktin fær lögbundið hlutverk í loftslagsmálum.