- 6 stk.
- 10.09.2019
Hengibjörk í Kjarnaskógi, skammt frá leiksvæðinu Birkivelli, var trúlega gróðursett í kringum 1970. Lengi vel var ekki vitað um tréð í skóginum en við grisjun fyrir um 30 árum uppgötvuðu þeir Helgi Þórsson og Aðalsteinn Svanur Sigfússon sem þá störfuðu hjá Skógræktarfélagi Eyfirðinga tréð og rýmkuðu til fyrir því. Árið 2009 var þetta tré valið tré ársins hjá Skógræktarfélagi Íslands. Tréð er líklega komið upp af fræi frá Rognan í Noregi en Kivalo og Kittila í Finnlandi koma einnig til greina. Þetta tré gengur undir nafninu Margrét eða jafnvel frú Margrét. Helgi Þórsson lét það heita eftir keðjusög sinni sem hann vann með daginn sem tréð uppgötvaðist en honum þótti heitið líka hæfa vegna þess hversu mjög hangandi greinar trésins eru. Þær minna því á grát svo sem Mar-grét gæti vísað til frjálslega haft.