Degli

 

Degli (fræðiheiti: Pseudotsuga) er lítil ættkvísl a.m.k. sex tegunda sígrænna barrtrjáa af þallarætt (Pinaceae). Fjórar tegundir eru í Austur-Asíu, allar sjaldgæfar, og tvær í vestanverðri Norður-Ameríku. Sú eina sem hefur umtalsverða útbreiðslu er hið eiginlega degli (Pseudotsuga menziesii). Það er einkennandi tré fyrir stór svæði í vestanverðum Bandaríkjunum og Kanada og er geysilega mikilvægt timburtré þar um slóðir.

Degli er náskylt lerki og er líklegt að lerki hafi þróast frá trjám sem líktust degli. Degli vex við hærri sumarhita og lengri sumur en Ísland hefur að bjóða, en ekki miklu lengri. Það er því á mörkunum að vera nothæft í skógrækt hérlendis líkt og evrópulerki.

Degli
/döglingsviður
/douglasgreni
Pseudotsuga menziesii 

Hæð: Mjög stórt tré, a.m.k. 30 m hérlendis
Vaxtarlag: Einstofna tré með keilulaga krónu
Vaxtarhraði: Getur verið allmikill
Hvaða landshluta: Einkum í innsveitum
Sérkröfur: Þarf mjög gott skjól í æsku
Styrkleikar: Fallegt tré, verðmætur viður
Veikleikar: Haustkal, lítil reynsla

Athugasemdir: Degli hefur náð 20 m hæð í Hallormsstaðaskógi og er til í skógum víða um land. Líkt og með evrópulerki er tími þess í almennri skógrækt þó ekki enn kominn


Gamla deglið frá 1940 á Atlavíkurstekk
í Hallormsstaðaskógi. Það mældist 20 m hátt um 2009.