Viðburðir

20.08.2017, kl.14:00 - 17:00 Atburðir

Afmælishátíð Mógilsár

Fræðsla, skemmtun og hressing sálar og líkama

Rannsóknastöð skógræktar Mógilsá á fallegum sumadegi 2017.
Mynd: Edda S. Oddsdóttir.

Hálfrar aldar vísindastarfi á Rannsókna­stöð skógræktar Mógilsá verður fagnað í skóg­inum við stöðina sunnudaginn 20. ágúst. Haldinn verður skógardagur að skógar­manna sið og gestir fá að kynnast þeim spennandi verkefnum sem starfsfólk stöðvar­innar vinnur að.

Lögð verður áhersla á starfið á Mógilsá og starfsfólk kynnir verk sín og verkefni. Sýnd­ar verða trjámælingar, pöddur, klipping stikl­inga, efni um kolefnisbindingu og margt fleira. Ólafur Oddsson, fræðslufulltrúi Skóg­ræktarinnar, sýnir réttu handbrögðin við tálgun og fólk fær að spreyta sig með hnífinn. Bakaðar verða lummur og hitað ketilkaffi með meiru eins og skylt er á skógardegi. Skógrækt er ekki bara ræktun heldur líka nytjar og því er líka við hæfi að kljúfa við og saga, jafnvel að fara í axarkast og annað sem skógarmönnum kann að detta í hug.

Margt hefur breyst á Mógilsá frá því þessi mynd var tekin 1965. Dýrmætastur er skógurinn sem hefur breytt staðnum úr vindbarinni bújörð í skjólsælt skóglendi og rannsóknarsvæði.

Í tilefni hálfrar aldar afmælisins verða líka gróður­settar 50 eikur á Mógilsá sem er ekki síst táknrænt fyrir alþjóðlegt samstarf stöðv­arinnar og sömuleiðis fyrir sífellt betri aðstæður til skógræktar á Íslandi með vax­andi grósku, skjóli og betri skilyrðum. Fyrr­verandi starfsfólk Mógilsár er velkomið að koma til að gróðursetja eikurnar og minnast um leið afmælisins.

Undanfarið hefur Valdimar Reynis­son, skógarvörður á Vesturlandi, unnið ásamt starfsmönnum sínum að lagfæringu og kurl­un stíga í skóginum á Mógilsá. Sömu­leiðis er unnið að endurbótum og merking­um trjásafnsins og Lars Nilsen, skóg­tækn­ir og þúsundþjalasmiður hjá Skóg­ræktinni á Vöglum, hefur búið til bekki og þrauta­brautir fyrir börn.

Allt áhugafólk um skógrækt, skógarnytjar, skógarmenningu og skógarvísindi er boðið velkomið á afmælishátíðina milli klukkan 14 og 17 sunnudaginn 20. ágúst.

Texti: Pétur Halldórsson