Hagsmunaaðilar

Skógrækt ríkisins leggur áherslu á góð gagnkvæm samskipti við alla hagsmunaaðila stofnunarinnar. Stefnt er að því að bæta öll samskipti þannig að tryggja megi sem víðtækasta sátt um starfsemi SR meðal allra sem starfa við skógrækt og landnýtingu.

Rekstur SR er að mestu fjármagnaður með framlagi af fjárlögum ríkisins. Stofnunin leggur áherslu á að nýta sem best það fjármagn sem ráðstafað er hverju sinni til skógræktarmála, m.a. með hagkvæmni í rekstri og aukinni kostnaðarvitund starfsmanna. SR leggur áherslu á að góð og opin samskipti við landbúnaðarráðuneytið og önnur ráðuneyti séu lykilþáttur í að markmið stofnunarinnar náist.

Atvinnulífið og sveitarfélögin í landinu hafa tekið virkan þátt í skógrækt á undanförnum áratugum og því er mikilvægt að SR hlúi að samstarfi og samskiptum við þessa aðila. Þar á meðal eru skógarbændur sem reglulega leita eftir þjónustu, fræðslu og ráðgjöf frá SR. Samvinna við sveitarfélög er hluti af stærra verkefni við að bæta búsetuskilyrði og tryggja byggð í dreifbýli.

Mikilvægt er að byggja upp og viðhalda góðri ímynd gagnvart almenningi. Leggja þarf áherslu á upplýsingamiðlun og fræðslu til ræktenda og gefa almenningi tækifæri til að nýta þjóðskógana í frístundum. Mikilvægasti hópurinn er unga kynslóðin, en leggja þarf áherslu á „skógaruppeldi“ grunnskóla- og framhaldsskólanema.

Þróun skógræktar hefur verið á þá leið að LHV eru nú stærsti viðskiptavinur SR. Mikilvægt er að gera hlutverkaskiptingu milli þessara aðila skýrari í framtíðinni, þannig að samstarfið einkennist af gagnkvæmri virðingu og opnum samskiptum.

Mikilvægt er að SR hafi frumkvæði að öflugu samstarfi við skógræktarfélögin og að stofnunin dragi sig í hlé á sviðum þar sem samkeppni ríkir og sem augljóst er að frjáls félög geta sinnt. Landssamtök skógareigenda er hagsmunafélag skógarbænda á landsvísu. Mikilvægt er að samtökin eflist í baráttu fyrir hagsmunum skógareigenda. Ennfremur ber að upplýsa ýmis umhverfisverndarsamtök (s.s. Náttúruverndarsamtök Íslands og Landvernd) um hlut skógræktar í umhverfisvernd.

SR leggur áherslu á að laða til sín hæft starfsfólk með fjölbreytta menntun og bakgrunn. Áhersla er lögð á að bjóða upp á góða vinnuaðstöðu, með greiðum aðgangi að upplýsingum og reglulegum tækifærum til endurmenntunar og starfsþróunar. Lögð er áhersla á samvinnu þvert á svið starseminnar og að saman fari völd og ábyrgð.

SR leggur áherslu á að viðhalda góðum tengslum og efla samstarf við aðrar rannsóknarstofnanir og æðri menntastofnanir, m.a. til þess að nýta sem best þekkingu og fjárfestingar til rannsókna. Hér má nefna RALA, Náttúrufræðistofnun, HÍ, HA, LBH og Garðyrkjuskóla ríkisins. Einnig er mikilvægt að viðhalda góðum samskiptum við þá aðila sem hafa umsjón með fjármögnun rannsókna, svo sem menntamálaráðuneyti, fjármálaráðuneyti, RANNÍS og Framleiðnisjóð landbúnaðarins.

Starfsemi SR er háð góðum samskiptum og samvinnu við ýmsar innlendar fagstofnanir og samtök. SR á mikilvæg samskipti við þessa aðila, m.a.varðandi umsagnir, samráð, fjármögnun og samrekstur verkefna. Þar á meðal eru Landgræðsla ríkisins, Ferðamálaráð, Umhverfisstofnun, Fornleifavernd ríkisins, Skipulagsstofnun og Bændasamtökin.

Samstarf við erlenda aðila er mikilvægur hluti af starfsemi SR. Sérstaklega á þetta við um rannsókna- og þróunarstarf, þar sem átt hefur sér stað gagnkvæm miðlun þekkingar við erlendar systurstofnanir, vísindaaðila og alþjóðasamtök. Áhersla er lögð á virka þátttöku í verkefnum á vegum rammaáætlana ESB og Norrænu ráðherranefndarinnar. Tryggja þarf að rödd Íslands heyrist í umræðum um ýmsa alþjóðasáttmála.