Fréttir

26.04.2018

Skógræktin bindur fyrir Coca-Cola

Gróðursett í 1,5 hektara á ári í Haukadal næstu 3 árin

  • Carlos Cruz, forstjóri Coca-Cola European Partners á Íslandi, og Þröstur Eysteinsson skógræktarstjóri við undirritun samningsins.

Undirritað var í gær samkomulag milli Coca-Cola á Íslandi og Skógræktarinnar um gróðursetningu trjáplantna í 1,5 hektara á ári næstu 3 árin í Haukadal í Bláskóga­byggð. Samtals verður því gróðursett í 4,5 hektara til loka ársins 2020. Kolefnis­bind­ing­in verður eign Coca-Cola á Íslandi í hálfa öld.

Samstarf Coca-Cola á Íslandi, áður Vífilfells hf., og Skógræktarinnar um eflingu skóg­ræktar í Haukadal í Bláskógabyggð nær aftur til ársins 1989 og hefur því brátt staðið í 30 ár. Í Haukadal er 20 hektara reitur með allt að 10 metra háum trjám sem ræktaður hefur verið í því samstarfi og nefnist Coke-skógurinn. Í tímans rás hafa orðið sameiningar, nafnabreytingar og eigenda­skipti en stuðningur Coca-Cola við skógrækt á Íslandi heldur áfram.

Samstarfssamningurinn sem undirritaður var í gær er gerður milli Skógræktarinnar og Coca-Cola European Partners Ísland ehf. (CCEP) um skógrækt í Haukadal. Á næstu þremur árum er stefnt að því að CCEP fjármagni gróður­setn­ingu á 1,5 hektara svæði á ári, eða samtals 4,5 hektara af skógrækt í Haukadal í Bláskógabyggð, á svæði sem áður var rofið land. Skógurinn sjálfur verður eign Skógræktarinnar en kolefnisbindingu skógarins getur CCEP talið fram í sína þágu til 50 ára frá gróðursetningu.

.

Samstarfið er liður í sjálfbærnistefnu Coca-Cola European Partners sem ber nafnið „Áfram veginn“. Stefnan er í 6 köflum og með 21 tímasettu markmiði til ársins 2025. Einn kaflinn í sjálfbærnistefnunni fjallar um loftslagsmál. Sam­starf CCEP og Skógræktarinnar er mótvægisaðerð vegna kolefnisfótspors fyritækisins en fyrirtækið hefur það að markmiði að framleiðsla fyrirtækisins hér á landi verði 100% kolefnisjöfnuð innan fárra missera.

Coca-Cola European Partners er aðili að loftslagsyfirlýsingu Festu, samtaka um samfélagsábyrgð fyrirtækja, Reykjavíkurborgar og 103 annarra fyrirtækja á Íslandi um að draga úr losun gróðurhúsalofttegunda og lágmarka neikvæð umhverfisáhrif með markvissum aðgerðum. Verkefnið hefur vakið athygli á alþjóðlegum vettvangi og var kynnt á Parísarráðstefnunni um loftslagsmál (COP21) í desember 2015.

Á meðfylgjandi myndum eru Carlos Cruz, forstjóri Coca-Cola European Partners á Íslandi, og Þröstur Eysteinsson skógræktarstjóri við undirritun samningsins.

Myndir: CCEP




banner4