Fréttir

13.12.2017

Ljóðaganga í desember

Andri Snær Magnason gestur „Litl ljóða hámerarinnar“ í Hallormsstaðaskógi

  • Andri Snær Magnason fer með ljóð í Trjásafninu á Hallormsstað. Með honum voru Stefán Bogi Sveinsson og Sigríður Lára Sigurjónsdóttir sem lásu ýmis ljóð eftir austfirsk ljóðskáld.

Skógurinn er upplagður vettvangur allan ársins hring til ýmiss konar viðburða. Skógarskjólið gerir að verkum að í skóginum er hægt að koma saman og njóta menningarviðburða jafnvel þótt utan skógarins sé næðingssamt og kalt. Á laugardaginn var haldin ljóðaganga í Hallormsstaðaskógi á vegum verkefnisins „Litl ljóða hámerin“. Aðalgestur ljóðagöngunar var skáldið Andri Snær Magnason en með honum voru Stefán Bogi Sveinsson og Sigríður Lára Sigurjónsdóttir sem lásu ýmis ljóð eftir austfirsk ljóðskáld. Gengið var um Trjásafnið og staldrað við á völdum stöðum til að hlýða á ljóðalestur. Í lok göngunnar var drukkið ketilkaffi að hætti skógarmanna við bálköstinn. Meðfylgjandi myndir tók Þór Þorfinnsson skógarvörður að þessu skemmtilega tilefni.

Eldurinn og skógarmannakaffið yljar sérlega vel, ekki síst í vetrarljóðagöngu í skógi.

Andri Snær með skáldamál við eldinn.

Heimild og myndir: Þór Þorfinnsson




banner3