Fréttir

10.08.2017

Grenitrén standa áfram á Þingvöllum

Felld þegar þau hafa aldur til og ekki leyft að breiðast út

Grenitré á sumarbústaðarlóð við Valhallar­reitinn á Þingvöllum fá að vaxa þar áfram þar til eðlilegt þykir að fella þau, segir skóg­ræktarstjóri. Smám saman verði útlensku trén fjarlægð og þeim ekki leyft að breiðast út.

Fréttablaðið fjallar um málið í dag og ræðir við Þröst Eysteinsson skógaræktarstjóra. Skógræktin muni í samráði við Þingvalla­þjóðgarð ákveða örlög grenilundarins við umrætt sumarhús sem ríkið hefur keypt. Boðað hafði verið að grenitrén yrðu upp­rætt en það stendur ekki til á næstu árum.

Grein blaðsins er á þessa leið:

Ekkert verður af því að trjálundur sem stendur umhverfis sumarbústað næst Valhallarreitnum á Þingvöllum verði upprættur eins og til stóð.

Ríkið keypti„ í fyrrahaust sumarbústaðinn sem um ræðir. Eins og fram kom í Fréttablaðinu í febrúar síðastliðinn sagði Ólafur Örn Haraldsson þjóðgarðsvörður í bréfi til forsætisráðuneytisins að ætlunin væri að rífa húsið og „uppræta greniskóg sem er á lóðinni og hefur slæm sjónræn áhrif og opna aðgang að henni fyrir almenning“.

Sex dögum síðar gagnrýndi Aðalsteinn Sigurgeirsson, fagmálastjóri Skógræktarinnar, áformin harðlega í Frétta­blaðinu. Og nú virðist vera fallið frá því að „uppræta“ trén.

„Við kölluðum Skógrækt ríkisins til ráðuneytis og samstarfs um að grisja reitinn við Valhallarplanið og var byrjað lítillega á því í sumar samkvæmt þeirra tillögum,“ svarar þjóðgarðsvörður spurður um stöðuna á trjágróðrinum.

Þröstur Eysteinsson skógræktarstjóri segir að úlfaldi hafi verið gerður úr mýflugu því þótt staðið hafi „í ein­hverju plaggi með rökstuðningi fyrir að kaupa bústaðinn“ að fjarlægja ætti trén þá hafi ekki verið um nein út­færð plön af hálfu þjóðgarðsins að ræða. Skóginn þurfi þó að grisja. Áætlun um það sé ekki tilbúin en verði gerð út frá umhverfisþáttum eins og útsýni.

„Ef 40 metra hátt sitkagrenitré er fyrir þriðjungi af útsýni á Hakinu er spurning hvort tréð eigi að vera áfram eða útsýnið,“ útskýrir Þröstur. Þótt grenið sé núna fimmtán metra hátt og langt í að það nái fjörutíu metra hæð þá geti það gerst. Horfa þurfi langt fram í tímann. „Við erum ekki að tala um að gera þetta á næstu árum.“

Tré sem teljast af erlendum uppruna eru á fleiri stöðum í Þingvallaþjóðgarði og sumum finnst þau falleg. „Fólk gróðursetti tré í þjóðgarðinn vegna þess að því fannst það vera að gefa landinu betri gróður heldur en var þar áður – af því að birkikjarrið var bara talið vera rusl,“ segir Þröstur. Engar öfgar séu gagnvart þessum erlendu trjám í Þingvallaþjóðgarði. „Að minnsta kosti ekki eins og í gamla daga þegar sumir vildu ganga hart fram og fjarlægja öll útlensku trén á Þingvöllum.“

Skógræktarstjóri segir að til framtíðar séu valmöguleikarnir tveir. „Ef við gerum ekkert þá munu þessi tré sá sér og breiðast út. Þau munu vaxa upp úr birkikjarrinu og koma í staðinn fyrir það. Það er ekki vilji núna til þess að það fái að gerast óhindrað, hvorki hjá þjóðgarðinum né hjá Skógræktinni. Af því að einmitt á þessum stað, í þjóðgarðinum, er í sjálfu sér eðlilegt að halda svolítið upp á birkikjarrið.“

Eðlileg framtíðarstefna sé því sú að útlensku trén hverfi á endanum úr þjóðgarðinum. „Smám saman verða útlensku trén fjarlægð þegar eðlilegt þykir; grisjuð eðlilega, felld þegar þau eru komin á aldur og ekki leyft að breiðast út,“ segir skógræktarstjórinn.




banner5