Fréttir

02.05.2017

Fyrsti starfsmannafundur Skógræktarinnar

Málefni stofnunarinnar rædd og skógar skoðaðir

  • Þröstur Eysteinsson skógræktarstjóri stendur við ríflega aldargamla blæösp í Grundarreit í Eyjafirði og fræðir starfsfólkið um þennan sögulega reit.

Nær allir starfsmenn Skógræktarinnar komu í síðustu viku saman á Hótel Kjarna­lundi í Kjarnaskógi. Farið var yfir hvernig til hefði tekist með hina nýju stofnun og ýmis mál reifuð. Að sjálfsögðu voru líka skoðaðir eyfirskir skógar.

Blíðuveður var dagana 25. og 26. apríl þegar fundurinn var haldinn. Þetta er fyrsti starfsmannafundur Skógræktarinnar eftir að stofnunin tók formlega til starfa 1. júlí 2016. Fundurinn hófst með því að haldin voru nokkur erindi um það sem efst er á baugi hjá Skógræktinni og verkefnin fram undan. Björn B. Jónsson greindi frá starfi sínu að markaðs- og afurðamálum og þriggja ára áætlun sem hann hefur lagt fram í þeim efnum. Verkefnið kallast Skógar­fang. Ólafur Oddsson fræðslufulltrúi sagði m.a. frá undirbúningi diplóma­náms í skógarleiðsögn sem hann vinnur nú að og Gunnlaugur Guðjónsson fjármálastjóri fór yfir fjárhaginn og ýmsar hagræðingarleiðir sem færar eru til að lækka kostnað í hinni sameinuðu stofnun, ekki síst í fjarskipta- og tölvumálum.

Sæmundur Þorvaldsson segir frá búskaparskógræktarverkefnum í Húnaþingi vestra.

Sæmundur Þorvaldsson sagði frá fram­vindu búskapar­skógræktarverkefna í Húna­þingi vestra sem lofa góðu. Fjögur verkefni eru í burð­ar­liðnum og til viðbótar hyggjast nokkrir bændur gera hefðbunda skóg­rækt­ar­samn­inga. Arnór Snorrason talaði um árangurs­mat í skógrækt, aðferð­irnar sem þróaðar hafa verið til að mæla vöxt og ástand skóg­anna og mikilvægi slíkra mælinga. Sigríður Júlía Brynleifs­dóttir ræddi stutt­lega um samræmt verklag á þjónustu við skógarbændur og tilrauna­útgáfu hand­bókar sem skógræktar­ráðgjaf­ar vinna nú eftir. Aðalsteinn Sigurgeirsson fagmála­stjóri fjallaði um frumvarp að nýjum skóg­ræktarlögum sem nú bíður umfjöllunar Alþingis, einnig um Parísarsamkomulagið og hvort það myndi leiða til skógræktar og sömuleiðis benti hann á hversu vel skógrækt fellur að sjálfbærnimarkmiðum Sameinuðu þjóðanna.


Björn Bjarndal segir frá vinnu sinni að þriggja ára áætlun um afurða- og markaðsmál, svokallað Skógarfang.

Að loknum hádegisverði fór Þröstur Ey­steins­son skógræktarstjóri yfir stefnumálin sem Skógræktinni voru sett í að­draganda þess að stofnanir voru sameinaðar og Skógræktin varð til. Mótun hinnar nýju stofnunar er enn í fullum gangi og með starfsmannafundinum gafst bæði tækifæri til að upplýsa starfsfólkið, heyra álit þess og ræða málin, hvað áunnist hefði og hvað mætti bæta.

Því næst var starfsmannahópnum skipt í sex vinnuhópa þar sem blandað var saman fólki af öllum sviðum og starfstöðvum Skóg­ræktarinnar. Hóparnir fengu úthlutað ýmsum áherslumálum sem sett höfðu verið í sameiningarstarfinu. Hóparnir ræddu svo hvernig til hefði tekist með þau og hvað mætti betur fara. Fjallað var um gildi Skógræktarinnar sem eru fagmennska, samvinna og framsækni, og hvort þau stæðust enn. Einnig um áherslurnar næstu árin í rannsóknum, þjóðskógum, útivistarmálum almennings, skógar­þjónustunni, landsáætlun, fræðslumálum, kynningar- og markaðsmálum. Ritarar og hópstjórar kynntu í lokin helstu niðurstöður umræðna í hverjum hópi en framkvæmdaráð Skógræktarinnar tekur við skýrslum hópanna og notar í áframhaldandi gæða- og  stefnumótunarstarfi.

Svo virðist sem ekki hafi allir bresku dátarnir horfið heim á sínum tíma. Í það minnsta var þessi á ferli í skóginum í grennd við skotgrafir og byssustæði sem þar sjást enn ummerki um.

Að fundi loknum fór Hallgrímur Indriðason fyrir göngu starfsmannahópsins um elsta hluta Kjarnaskógar þar sem meðal annars var komið við í rauðgrenilundi frá 1947, elstu gróðursetningunni í skóginum. Einnig voru skoðaðar stríðsminjar, skotgrafir og loftvarnarbyssustæði sem er að finna í skóg­inum steinsnar frá Hótel Kjarnalundi. Þar virtist sem breski herinn hefði ekki alveg yfirgefið svæðið því fólki sýndist dáta með alvæpni bregða fyrir inn á milli trjánna. Um kvöldið var svo árshátíð starfs­manna með heimatilbúnum skemmti­atrið­um og gamanmálum.

Í Kristnesskógi var skoðaður nýr malbikuður stígur sem Skógræktin hefur lagt þar í samstarfi við Sjálfsbjörgu á Akureyri og svo var gengið um skóginn undir leiðsögn Rúnars Ísleifssonar skógarvarðar.

Síðari dag starfsmannafundarins var haldið í skoðunarferð um Eyjafjörð fram, gengið um Kristnesskóg þar sem nýlega var mal­bikaður 300 metra langur skógar­stígur fyrir hreyfihamlaða og einnig um Grundarreit, einn elsta skógræktarreit landsins þar sem sjá má ríflega aldar­gamlar lindifurur, blæaspir og fleiri trjá­tegundir. Síðan var ekið inn fyrir Melgerðis­mela og til baka austan fjarðar en þar með lauk þessum fyrsta starfsmannafundi Skógræktarinnar sem þótti vel heppnaður í alla staði.

Fleiri myndir frá starfsmannafundinum, árs­hátíðinni og skógargöngunum má finna í myndasafninu hér á skogur.is. Kvikmynda­gerðarmaður Skógræktarinnar, Hlynur Gauti Sigurðsson, setti líka saman í stutt myndband nokkur myndbrot úr skoðunar­ferðunum sem hér fylgir sömuleiðis.

Myndband: Starfsmannafundur Skógræktarinnar 

Texti og ljósmyndir: Pétur Halldórsson
Myndband: Hlynur Gauti Sigurðsson




banner3