Fréttir

31.01.2017

Starfsfólk Skógræktarinnar á GIS-námskeiði

Þátttakendur staddir á sjö stöðum á landinu

  • Frá Mógilsá í morgun þegar námskeiðið var að hefjast. Starfsfólk Skógræktarinnar af Vestur- og Suðurlandi kom saman á Mógilsá en með fjarfundarbúnaði er fylgst með námskeiðinu á sex öðrum stöðum á landinu. Mynd: Hlynur Gauti Sigurðsson.

Í morgun hófst tveggja daga námskeið hjá Skógræktinni um landupplýsingavinnslu í ArcGIS-kerfinu. Námskeiðið er einkum ætlað skógræktarráðgjöfum Skógræktar­innar sem starfa vítt og breitt um landið. Þátttakendur í námskeiðinu sitja nú á sjö stöðum á landinu og fylgjast með gegnum nýtt fjarfundakerfi Skógræktarinnar. Þetta sparar tíma, fé og fyrirhöfn en dregur líka úr koltvísýringslosun.

Fyrri dag námskeiðsins er farið yfir ýmis hagnýt atriði sem snerta landupplýsinga­vinnslu í ArcGIS, Einnig verður stutt kynn­ing á QGIS-hugbúnaðinum sem er ókeypis, einfaldur í notkun og býður upp á ýmsan sveigjanleika. Seinni dagurinn verður hins vegar helgaður ArcGIS Online.

Landupplýsingatækni fleygir nú mjðg fram og sífellt koma nákvæmari gögn sem gera kleift að kalla fram mismunandi kort af landsvæðum eftir því hvers konar upplýsinga er óskað hverju sinni. Meðal annars er nú hægt að greina væntanleg skógræktarsvæði mjög nákvæm­lega eftir hæðarlínum sem hefur margvíslega kosti í för með sér við skógræktarskipulag og gerð skógræktaráætlana. Mun auðveldara er nú til dæmis að greina lægðir í landslagi, svo­kallaða frostpolla þar sem ungum trjáplöntum getur verið hætt við skemmdum vegna ótímabærra frosta, einkum á vori og hausti. Slíkar upplýsingar geta líka nýst við skipulag skógarvega, girðingarstæða og fleira og fleira. Kalla má fram með svipuðum hætti úrkomukort fyrir tiltekin svæði og fleira mætti nefna. Sífellt bætist við gagnagrunninn af upplýsingum sem geta komið að gagni við gerð skógræktarskipulags og skógræktarsamninga.

Björn Traustason, landfræðingur og sérfræðingur á Rannsóknastöð skógræktar, Mógilsá, hefur umsjón með nám­skeiðinu. Hann stýrir námskeiðinu frá Mógilsá og þar er líka samankomið starfsfólk af Vestur- og Suðurlandi. Aðrir þátttakendur sitja á Þingeyri, í Bjarnarfirði á Ströndum, á Silfrastöðum í Skagafirði, á Akureyri, Egilsstöðum og Tuma­stöðum.

Þessari ljósmynd var smellt af sýningartjaldinu í Gömlu-Gróðrarstöðinni á Akureyri þar sem hluti af þátttakendum á námskeiðinu situr. Á tjaldinu er kort sem Björn Traustason er að fjalla um en í litlu gluggunum neðst sjást þátftakendur hver á sínum stað á landinu. Mynd: Pétur Halldórsson.

Skógræktin hefur tekið í notkun fjarfundar­kerfið StarLeaf sem gerir kleift að halda ýmsa fundi, námskeið og fyrirlestra sem allt starfsfólk stofnunarinnar getur tekið þátt í án þess að eyða tíma, fé og fyrirhöfn í ferðalög. Framkvæmdaráð Skógræktar­innar heldur nú flesta fundi sína með þessu kerfi og með því hefur nú þegar sparast bæði tími og peningar sem ella hefðu farið í flugferðir. Fjarfundakerfið tengir því starfs­fólkið betur saman, gefur færi á reglulegri fræðslu og endur­mennt­un, gerir auðveld­ara að halda ýmsa fundi og síðast en ekki síst fellur þetta vel að umhverfisstefnu Skógræktarinnar. Stofn­un­in vill stuðla að bindingu koltvísýrings með aukinni skóg­rækt en um leið leitast við að draga eins og kostur er úr losun vegna starfsemi sinnar.

Texti: Pétur Halldórsson




banner2