Fréttir

01.03.2016

Hægt að binda alla losun frá samgöngum og sjávarútvegi

Fjórföld framlög til skógræktar og landgræðslu myndu duga

Ef framlag stjórnvalda og einstaklinga til landgræðslu og skógræktar yrði fjórfaldað frá því sem nú er væri hægt að binda sam­svarandi magn koltvísýrings í andrúms­loftinu árið 2030 og gert er ráð fyrir að allar samgöngur og sjávarútvegur á Íslandi muni losa á þeim tíma. Þetta sagði Brynhildur Davíðsdóttir, prófessor í umhverfis- og auðlindafræði við Háskóla Íslands, á ráðstefnu sem Landsbankinn hélt í gær um áhrif Parísarsamkomulagsins á atvinnulífið.

Fjallað er um erindi Brynhildar í Frétta­blaðinu í dag. Á ráðstefnunni í gær fjallaði hún um niðurstöður loftslagsráðstefnunnar í París í íslensku samhengi og hjá henni kom fram að losun gróðurhúsalofttegunda (GHL) á Íslandi væri 26% meiri nú en hún var árið 1990. Losunin hefur stóraukist frá iðnaði (78%) og samgöngum (39%) en dregist verulega saman frá sjávarútvegi (-42%). Síðan segir í umfjöllun Svavars Hávarssonar fréttamanns:


Ef binding GHL í landnotkun er reiknuð inn í þessa mynd þá hefur nettólosunin aukist mun minna, eða um 15% frá því sem var árið 1990. Á þessum tíma hefur hlutfallsleg losun stóriðju vaxið úr 32% í 45% af heildinni en í sjávarútvegi minnkað úr 22% árið 1990 í 10%.
   Brynhildur sagði, í samhengi við þessa tölfræði, hvað við getum gert, og hvar við eigum að leggja áherslu á að bregðast við. Hún vék líka að framtíðarsýninni – eða spám um losun. Að óbreyttu, eða án uppbyggingar í stóriðju, sem Brynhildur sagði reyndar óraunhæft, verður losun á Íslandi árið 2030 aðeins fimm prósent yfir losun árið 1990 með bindingu með skógrækt og landgræðslu. Ef öll áform um uppbyggingu stóriðju ganga hins vegar eftir á næstu árum gera spár ráð fyrir því að losun gróðurhúsaloftegunda frá Íslandi muni aukast um108% miðað við losun ársins 1990. Verði ekki af uppbyggingu í áliðnaði en áætlanir um rekstur þriggja nýrra kísilvera ganga eftir mun nettólosun engu að síður aukast um 72%.
   Þessar tölur eru svokölluð háspá, og ekki tekið tillit til bindingar innan íslenska hagkerfisins og skal taka sérstaklega fram að binding með endurheimt votlendis er þá ekki reiknuð til tekna. Samsvarandi tölur með bindingu yrðu 91% aukning, og 54% ef aðeins þrjú kísilver yrðu byggð og rekin hér árið 2030.
   Fjölmargt er hægt að gera til að minnka losun á næstu árum. Það sem getur átt við um öll fyrirtæki eru mótvægisaðgerðir eins og að draga úr beinni losun vegna eigin starfsemi, og þá ekki síst orkunotkun og í flutningum. Óbeint má hafa áhrif með því að velja sér græna birgja, en einnig í samgöngum hjá starfsmönnum og að velja viðskiptavini eftir sótspori þeirra. Einnig með þátttöku í landgræðslu, skógrækt og endurheimt votlendis. Árangri má líka fljótt ná með grænum fjárfestingum.

Texti: Pétur Halldórsson




banner5