Fréttir

09.06.2015

Hátíðargróðursetning á 60 ára afmæli Hlíðaskóla

Skólinn hefur verið með í samstarfinu Lesið í skóginn frá upphafi

  • Bústinn og frísklegur fjallaþinur fær moltuskammtinn sinn.

Hlíðaskóli í Öskjuhlíð í Reykjavík er sextíu ára í dag, 8. júní, og að því tilefni var í gær efnt til hátíðargróðursetningar í grenndarskógi skólans. Fjórir nemendur úr hverjum árgangi tóku þátt í gróðursetningunni. Unnið hafði verið að undirbúningi um tíma í samvinnu við umhverfissvið borgarinnar sem hefur umsjá með Öskjuhlíðinni og starfsfólk Ræktunarstöðvarinnar í Fossvogi sem framleiddi fjölskrúðugar og myndarlegar trjáplöntur í þessa gróðursetningu.

Trén voru gróðursett í nokkuð stóran hring með góðu millibili og krónutrjám og barrtrjám plantað á víxl. Meðal tegunda sem gróðursettar voru má nefna ask, hlyn, þöll, fjallaþin, lerki, hrossakastaníu, silfurreyni og ilmreyni.

Á þessum stað austast í Öskjuhlíðinni eru helstu trjátegundirnar birki, stafafura og sitkagreni. Hlíðaskóli hefur verið með frá upphafii ísamstarfinu Lesið í skóginn og er einn fárra skóla sem boðið hafa upp á skógarval í 9. og 10. bekk í tengslum við náttúrufræði- og smíðakennslu í skógartengdu útinámi.

Það vakti athygli að allar plönturnar fengu heimagerða moltu í gróðursetningunni. Meðfylgjandi eru nokkrar myndir frá gróðursetningunni sem fór fram undir stjórn Kristrúnar G. Guðmundsdóttur skólastjóra, Einars Kristjáns Hilmarssonar smíðakennara og Ketils Helgasonar kennara.

Hér mun hlynurinn dafna vel og krakkarnir geta vitjað hans alla ævi.

Kristrún og Einar Kristján leiðbeina um gróðursetningu.

Silfurreynirinn búinn undir gróðursetningu.

Kátir krakkar í Hlíðaskóla búnir að gróðursetja fallega hrossakastaníu.

Kristrún skólastjóri ávarpar hópinn.

Texti og myndir: Ólafur Oddsson

 




banner5