Fréttir

20.10.2014

Rafljós plata tré

Lerkitré standa enn græn næst ljósastaurum í Kjarnaskógi

  • Hér er greinilegt hversu græn lerkitrén næst ljósastaurnum eru miðað við þau sem standa fjær.

Jafnvel gamlir símastaurar verða grænir aftur, segir í ljóði Tómasar Guðmundssonar og gott ef þeir syngja ekki líka í sólskininu. Þótt haustið hafi verið hlýtt og langt hefur þó ekki frést af slíkum kraftaverkum. Hitt er víst að þetta hlýja haust hefur brugðið upp ýmsum skemmtilegum myndum í skógunum okkar.

Fyrsta norðanáhlaupið er að vissulega að hellast yfir okkur í dag en til þessa  höfum við fengið að njóta haustlitanna til hins ýtrasta.

Fyrir helgi fréttist af því að lerkitré við ljósastaura í Kjarnaskógi á Akureyri héldu enn fast í græna litinn og þótti augljóst að rafljósin hefðu platað trén og dregið úr þeim að búa sig undir veturinn. Skógur.is fór á stúfana og myndaði tré við þrjá ljósastaura á afleggjaranum upp í Kjarna. Myndirnar voru teknar föstudaginn 17. október.

 Á meðfylgjandi myndum sést hve græni liturinn heldur sér vel á trjánum sem næst eru ljósastaurunum. Þau tré sem fjær eru hafa á hinn bóginn alveg klæðst haustlitum. Týran frá götuljósunum virðist duga til að trufla áhrif sólargangsins á trén sem næst staurunum standa.

Spurningin er svo bara hvort þetta hefur einhver áhrif á viðnám trjánna við klóm veturs konungs sem í dag sýna sig, beittar og nýbrýndar.


Hér fyrir neðan má svo sjá tré við Gömlu-Gróðrarstöðina á Akureyri sem felldu laufið hratt eftir fyrstu frostnóttina sem eitthvað kvað að þetta haustið. Laufin fuku ekki af trjánum heldur féllu tignarlega niður í logninu og lögðust eins og teppi í kringum trén.

Brjóstmyndin af Páli Briem norðan við Gömlu-Gróðrarstöðina við Krókeyri á
Akureyri stendur í skjóli gamals reyniviðar sem stóð heiðgulur vikum saman
í haust en nú liggja laufin rauðbrún undir trénu.

Texti og myndir: Pétur Halldórsson




banner2