Fréttir

24.10.2012

Barist við lúpínu í Þórsmörk - best að efla birkiskóginn

  • Ráðherra og föruneyti í Hallormsstaðaskógi.
Tilraun til þess að stemma stigu við útbreiðslu lúpínunnar í Þórsmörk með eitri árið 2009 mistókst gjörsamlega að sögn Svandísar Svavarsdóttur, umhverfis- og auðlindarráðherra. Þetta kom fram í svari hennar við fyrirspurn Unnar Brár Konráðsdóttur, þingmanns Sjálfstæðis-flokksins, á Alþingi í dag, um aðgerðir sem hefur verið gripið til, til þess að hefta útbreiðslu þessarar lífseigu plöntu í Þórsmörk.

Unnur Brá sagði það umhugsunarvert að Landgræðsla ríkisins skyldi hafa notað eitur til þess að hefta útbreiðslu tegundarinnar í Þórsmörk en eitrið drepur auðvitað allt sem fyrir verður. Og raunar vildi Jón Kr. Arnarsson, varaþingmaður Hreyfingarinnar, meina að eitrið auðveldaði raunar útbreiðslu lúpínunnar, þar sem samkeppninni væri í raun rutt úr vegi.

Svandís tók undir gagnrýni Unnar að hluta til, að það væri umhugsunarvert hvernig eitri væri beitt á svona svæðum, sérstaklega Þórsmörk sem þykir mikil náttúruperla. Hún sagðist aftur á móti bera fullt traust til Landgræðslu ríkisins og sérfræðinga á hennar vegum, en tilraun var gerð með eitrinu á litlu svæði. Skemmst er frá því að segja að sú tilraun mistókst algjörlega.

Svandís sagði hins vegar að Skógrækt ríkisins reyndi nú að efla birkiskóg með áburðargjöf en nú er það talin besta leiðin til þess að hefta útbreiðslu lúpínunnar sem virðist ekki vaxa inni í skógum.


Frétt: Vísir.is
Mynd: Esther Ösp Gunnarsdóttir




banner3