Fréttir

24.10.2007

Skógræktarfélag Reykjavíkur leggst gegn eyðingu skógar á Hólmsheiði

Mynd Eiríks Þ. Eiríkssonar frá skóginum á Hólmsheiði sem hann birtir á vefsíðu sinni, ásamt eftirfarandi texta: „Frábært útsýni yfir Reykjavík er á þessari leið sem er frekar fáfarin nema af hundaeigendum og hestamönnum og hefur oft gleymst þeim sem hafa gaman af göngum og jafnvel af borginni líka þar sem fleiri stíga mætti gera á svæðinu og einnig að setja upp kort með örnefnum.“

Stjórn Skógræktarfélags Reykjavíkur leggst alfarið gegn fyrirhuguðum byggingarframkvæmdum á Hólmsheiði og skorar á borgarstjórn Reykjavíkur að endurskoða aðalskipulagið frá grunni með þá hugsun að leiðarljósi, að finna aðrar lausnir á þróun borgarinnar en að ganga á það verðmæta útivistarsvæði, sem skógi vaxnar Austurheiðarnar sé fyrir borgarbúa.

Í umsögn Skógræktarfélags Reykjavíkur kemur m.a. fram að margt mæli gegn þessum framkvæmdum en eðli málsins samkvæmt byggir stjórn Skógræktarfélagsins afstöðu sína  einkum á þeirri miklu skóggræðslu sem fram hefur farið á Austurheiðunum frá miðjum níunda áratugnum, en hún hefur verið unnin í nánu samstarfi Reykjavíkurborgar og Skógræktarfélagsins.  Það svæði sem nú er til meðferðar eru 170 hektarar að flatarmáli og er svæðið fullgróðursett trjám. „Á þessu svæði hefur ræktun tekist framar björtustu vonum og er uppvaxandi skógur þar afar fallegur og í örum vexti. Ísland er eitt skógfátækasta land í heimi, en skógar landsins gegna engu að síður mikilvægu hlutverk fyrir almenning, því skóglendi er meðal vinsælustu útivistarsvæða. Því er enn meiri skaði en ella af því að fórna  því takmarkaða skóglendi sem er að finna innan Reykjavíkur undir iðnaðar- og athafnasvæði. Skógurinn er ennfremur hluti af fallegri umgjörð um borgina.“

Ennfremur kemur fram í umsögninni að ræktun skógarins á Hólmsheiði hafi að stærstum hluta verið unninn af ungmennum hjá Vinnuskóla Reykjavíkur, Skógræktarfélagi Reykjavíkur og grunnskólabörnum í Reykjavík. Unga fólkinu hafi á sínum tíma verið talið trú um, að þarna myndi með tímanum vaxa upp skógur til skjóls og prýði sem þau og afkomendur þeirra gætu síðar notið. „Menn skyldu því fara varlega í að eyðileggja þann ávinning til þess eins að rýma fyrir iðnaðarstarfsemi“.

 

Skipulagsráð Reykjavíkur samþykkti í lok ágústmánuðar, að auglýsa tillögu að nýju deiliskipulagi athafnasvæðis á Hólmsheiði. Svæðið er staðsett norðan Suðurlandsvegar á milli Hafravatnsvegar og hesthúsasvæðisins í Almannadal og er heildarstærð þessa nýja athafnasvæðis um 170 hektarar.

 


Í tilkynningunni frá skipulagsstjóra Reykjavíkur sem birt var í ágústmánuði var sagt að 100 hektarar af svæðinu færu undir lóðir sem yrðu af ýmsum stærðum, eða allt frá 0,1 hektara upp í 10 hektara. Flestar yrðu lóðirnar 0,1-0,5 hektarar að stærð. Húshæðir yrðu frá einni hæð og upp í sex hæðir. „Ef heimildir til uppbyggingar eru nýttar að fullu er áætlað að á svæðinu geti rúmast byggingar sem verða samtals allt að 700.000 m2 að flatarmáli. Með þessu nýja svæði er tryggt stóraukið framboð fyrirtækjalóða og mun meira en í boði hefur verið mörg undanfarin ár.“

 

Umsögn Skógræktarfélags Reykjavíkur

 

HÉRmá hlýða á viðtal Kristjáns Más Unnarssonar, fréttamanns á Stöð 2, við Helga Gíslason, framkvæmdastjóra Skógræktarfélags Reykjavíkur, vegna málsins.




banner1