Suðurland
  • Múlakot
    Múlakot
    (mynd: Hrafn Óskarsson)
  • Múlakot
    Múlakot
    (mynd: Hrafn Óskarsson)
  • Múlakot
    Múlakot
    (mynd: Hrafn Óskarsson)
  • Múlakot
    Múlakot
    (mynd: Hrafn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)
  • Múlakot
    Múlakot
    (mynd: Hreinn Óskarsson)

Múlakot

Í Múlakoti er trjásafn með fágætum trjátegundum og mikið útsýni. Þar var fyrsta gróðrarstöð Skógræktar ríkisins á Suðurlandi.

Almennt um skóginn

Að Múlakoti var fyrsta gróðrarstöð Skógræktar ríkisins á Suðurlandi og er þar nú eitt elsta og fjölbreyttasta trjásafn Suðurlands. Í skóginum er að finna stórvaxin, gömul tré af ýmsum trjátegundum, sumum sjaldséðum. Auk græðireitsins, sem er í skjóli klettaveggjarins, tilheyrir þjóðskóginum u.þ.b. 13 ha svæði í brekkunni ofan kletts.

Staðsetning og aðgengi

Múlakot er í Fljótshlíð, skammt frá Hvolsvelli. Keyrt er inn eftir vegi nr. 261. Múlakotsreiturinn er undir kletti spölkorn norðan við veginn og austan við gamla Múlakotsbæinn.

Aðstaða og afþreying

Þægilegt er að ganga um reitinn allan fyrir neðan klett. Stigi er upp á efra svæðið og þar liggur göngustígur í skóginum.

Saga jarðarinnar

Múlakotsreiturinn var þriðja gróðrarstöð Skógræktar ríkisins (á eftir þeim á Hallormsstað og Vöglum) og sú fyrsta á Suðurlandi. Árni Einarsson, bóndi í Múlakoti, „leigði“ Skógræktinni land undir gróðrarstöðina endurgjaldslaust. Gróðrarstöð var þó ekki rekin þar nema í rúm 10 ár því plöntuþörfin varð meiri en landrými í Múlakoti stóð undir. Úr varð að Skógræktin keypti jörðina Tumastaði í Fljótshlíð árið 1944 og stofnaði þar til gróðrarstöðvar en trjáplöntur voru seldar úr Múlakotsstöðinni framundir 1950.

Skógrækt ríkisins keypti Múlakotsreitinn, kvíabólið og brekkuna þar upp af árið 1990, alls um 13 ha lands.

Trjárækt í skóginum

Á árunum 1937-1939 var allmikið flutt inn af ungplöntum frá gróðrarstöðvum í Noregi og enduðu margar þeirra í Múlakoti. Þar á meðal var fyrsta sitkagrenið sem kom til Íslands, einnig fjallaþinur, álmur, askur, silfurreynir, gráreynir, gráelri, risablæösp, selja og viðja. Á stríðsárunum 1939-1945 varð sambandslaust við Noreg en sambönd mynduðust til Bandaríkjanna. Þaðan komu villiepli frá Alaska 1940 og fyrstu græðlingar alaskaaspar 1944. Fyrsta sáning lúpínu til landgræðslu var gerð á Þveráraurum skammt frá gróðrarstöðinni í Múlakoti 1945. Eftir það varð Múlakotsreiturinn og kvíabólið, svo kallað, að safnreit fyrir ýmsar tegundir sem ekki var treystandi á að gætu lifað annars staðar. Með tímanum bættust því við sífellt fleiri tegundir.      

Þjóðskógurinn í Múlakoti er réttilega kallaður trjásafn og þar er að finna hæstu einstöku tré landsins af ýmsum tegundum, þar á meðal hæsta álminn, hæstu hengibjörkina og hæstu blæöspina. Aðeins á Hallormsstað er alaskaösp hærri en í Múlakoti en munurinn er sáralítill. Í skóginum er að finna stórvaxin, gömul tré af sjaldséðum trjátegundum, s.s. aski, álmi, blæösp, hengibjörk, hlyni, fjallaþini og gullregni.

Annað áhugavert

Tilraunir voru gerðar með eplarækt í Múlakoti um 1950 en þær báru engan árangur og ekkert er eftir af eplatrjánum. Í apríl 1963 varð mikið hret eftir langvarandi hlýindi og í því kólu aspirnar í Múlakoti illa. Þær voru allar felldar í kjölfarið. Aspirnar í Múlakoti, sem nú ná um 25 metra hæð, eru því rótarskot upphaflegu aspanna frá 1944 en aðeins er rétt að telja aldur núverandi stofna frá 1963.

Senda grein