Norðurland
  • Þórðastaðaskógur
    Þórðastaðaskógur
    (mynd: Sigurður Skúlason)
  • Þórðastaðaskógur
    Þórðastaðaskógur
    (mynd: Sigurður Skúlason)
  • Þórðastaðaskógur
    Þórðastaðaskógur
    (mynd: Sigurður Skúlason)
  • Þórðastaðaskógur
    Þórðastaðaskógur
    (mynd: Sigurður Skúlason)
  • Þórðastaðaskógur
    Þórðastaðaskógur
    (mynd: Sigurður Skúlason)
  • Þórðastaðaskógur
    Þórðastaðaskógur
    (mynd: Sigurður Skúlason)

Þórðarstaðaskógur, Belgsá og Bakkasel

Myndar, ásamt nærliggjandi skógum, eitt mesta samfellda skóglendi á Íslandi.

Amennt um skóginn

Þórðarstaðaskógur er í innanverðum Fnjóskadal austan ár. Belgsá og Bakkasel eru sunnan við Þórðarstaði og eru hlíðar þar einnig skógi vaxnar. Þessir skógar mynda ásamt Lundsskógi eitt mesta samfellda skóglendi á Íslandi, og þar sem búið er að friða Lundsland einnig er stutt í að þeir myndi samfellu við Vaglaskóg einnig.

Staðsetning og aðgengi

Hægt er að komast í Þórðarstaðaskóg að norðan frá Vaglaskógi og Lundi en nauðsynlegt er að vera á fjórhjóladrifnum bíl. Sama gildir þegar komið er að sunnan yfir brú á Fnjóská við Illugastaði. Þaðan er einnig hægt að aka til suðurs um Belgsá og Bakkasel og áfram inn í Timburvalladal.

Aðstaða og afþreying

Um Þórðarstaðaskóg liggja þjónustuslóðir sem hægt er að ganga um. Að öðru leyti hefur ekkert verið gert í þágu ferðalanga.

Saga skógarins

Skógrækt ríkisins eignaðist Þórðarstaði árið 1945 og jarðirnar Belgsá og Bakkasel, sem komnar voru í eyði, ári seinna. Skógurinn í landi Þórðarstaða og Belgsár var friðaður 1946-1947 en Bakkaselsskógur er enn ófriðaður. Búskapur var áfram á Þórðarstöðum fram til 1995.

Trjárækt í skóginum

Stórvaxið birkiskóglendi er í Þórðarstaðaskógi en einnig gróðursettur skógur af lerki rauðgreni og stafafuru sem dafnar vel. Síðan Skógræktin tók við honum hefur birkiskógurinn verið nýttur til framleiðslu eldiviðar og smíðaviðar með svo kallaðri stakfellingu, þ.e. fellingu eldri trjáa innan úr þannig að skógurinn standi áfram. Felldu trén endurnýja sig síðan með teinungi upp af stubbnum. Á þann hátt viðheldst skógurinn samfara nýtingu.

Einnig hefur verið gróðursett í hluta skógarins og grisjað í þeim gróðursettu reitum sem náð hafa tilteknum þroska.

Samningur um kolefnisbindingu

Árið 2013 var gerður samningur milli Landsvirkjunar og Skógræktar ríkisins um skógrækt á skóglausu svæði í landi Belgsár. Stærð svæðisins sem um ræðir er alls 49 ha og með þessu bindur Landsvirkjun í skógi hluta af því kolefni sem losnar vegna starfsemi fyrirtækisins. Kolefnisbinding og kolefnisforði skóganna, þar með talið í trjánum, botngróðri og jarðvegi, er eign Landsvirkjunar til 50 ára frá dagsetningu viðaukasamnings um lokaáfanga skógræktar á svæðinu. Að þeim tíma loknum rennur það eignarhald til Skógræktarinnar endurgjaldslaust, eins og segir í samningnum. Rannsóknastöð Skógræktar, Mógilsá, mælir kolefnisbindingu í skóginum samkvæmt sérstökum ráðgjafarsamningi.

Annað áhugavert í skóginum

Í Þórðarstaðaskógi miðjum eru tóftir beitarhúsa og sunnar í skóginum er gerði hlaðið úr steinum. Á Belgsárhöfða eru menjar eftir rauðablástur (járnvinnslu úr mýrarrauða). Jarðfræði Fnjóskadals er einnig sérstök og í Þórðarstaðaskógi eru myndarlegir sandstallar sem mynduðust við það að lækir runnu út í stöðuvatn sem stóð uppi í dalnum á síðjökultíma.

Senda grein