Landupplýsingar
Landupplýsingagögn
Við Rannsóknastöð Skógræktar ríkisins á Mógilsá er vistaður landfræðilegur gagnagrunnur sem í eru öll kortlögð ræktuð og náttúruleg skóglendi landsins. Gagnagrunnurinn er þróaður í ArcGIS landfræðilegum upplýsingakerfum og byggist á flákum sem gefa til kynna staðsetningu og umfang skóglendisins og á bak við hvern fláka er töflugagnagrunnur þar sem eru upplýsingar um flatarmál skóglendis, tegund skóglendis, hæð og aldur.
Með því að smella á tengla hér að neðan er hægt að nálgast kort yfir ræktuð og náttúruleg skóglendi á Íslandi:
Hægt er að nálgast grunngögnin hjá sérfræðingi Skógræktar ríkisins, Birni Traustasyni (bjorn(hjá)skogur.is)
Ritaðar hafa verið greinar um gagnagrunninn þar sem nálgast má frekari upplýsingar um gagnagrunninn:
- Spatial distribution of forests and woodlands in Iceland in accordance with the CORINE land cover classification – Grein í Icelandic Agricultural Sciences
- Stærð skóglendis á Íslandi byggt á CORINE flokkun – Grein í riti Fræðaþings landbúnaðarins 2008
Upplýsingar um gögnin
Náttúrulegir birkiskógar og birkikjarr
Birkiskógur samanstendur af birkitrjám að lágmarki 2 m á hæð, lægra birki flokkast sem birkikjarr. Upplýsingum um náttúrulega birkiskóga og birkikjarr sem aflað var í tveimur birkiúttektum, árið 1972 – 1975 og 1987 – 1991. Í fyrri úttektinni var birki kortlagt ofan á loftmyndir og upplýsinga aflað um krónuþekju og hæð. Í seinni úttektinni voru gerðar frekari greiningar á birkilendum. Kort voru hnituð inn og gögnum varpað í ISNET hnitakerfið.
Árið 2006 voru gögnin lagfærð, staðsetning fláka var leiðrétt og ýmis töflugögn sem aflað var í birkiúttektunum voru tengd við flákana. Árið 2008 voru gögnin flutt inn í núverandi gagnagrunn þar sem settar voru inn upplýsingar um meðalhæð birkitrjáa í flákum. Gagnagrunnurinn var byggður upp á grundvelli landflokkunarkerfis CORINE og staðals fyrir landfræðilegar upplýsingar sjá hér.
Ræktað skóglendi
Ræktuðu skóglendi er skipt í fjóra meginflokka, laufskóga, barrskóga, blandskóga og skógræktarsvæði. Fyrstu þrír flokkarnir samanstanda af trjám hærri en 2 m á hæð, en í flokknum skógræktarsvæði eru nýgróðursetningar með trjám undir 2 m á hæð.
Vinna við gagnagrunninn hófst árið 2003 í tengslum við verkefnið Íslensk skógarúttekt og var í upphafi safnað saman flákum þar sem ýmsar upplýsingar um gróðursettar trjáplöntur koma fram. Í grunninum eru flákar frá öllum þeim aðilum sem sjá um skráningar í skógrækt á Íslandi, auk þess sem starfsmenn Íslenskrar skógarúttektar skrá niður alla ókortlagða skógarreiti á ferð sinni um landið. Árið 2008 var byggður upp gagnagrunnur fyrir ræktað skóglendi á grundvelli landflokkunarkerfis CORINE og staðals fyrir landfræðilegar upplýsingar sjá hér.
